「反叛股東」Eric Knight自從冇做滙控（00005）股東之後，相信滙控嘅管理層耳根清靜咗好多，依家就輪到嘉能可（00805）煩喇，皆因Eric旗下嘅公司Knight Vinke，「轉會」去咗做Xstrata股東，嘉能可想平價買Xstrata，睇怕要過埋Knight Vinke呢一關至得，一眾嘉能可管理層準備接招啦！
嘉能可提出以換股方式收購Xstrata，Xstrata其中一個主要股東卡塔爾控股，已經表明唔like個換股價，你唔加價，佢實反對到底。依家加埋Knight Vinke踩一腳，睇嚟呢單交易真係凍過水。
嘉能可原先提出以每2.8股換1股Xstrata，Knight Vinke批評出手「太低」，要求將換股比例提高至3.25股，相當於要求加碼16%，呢個要求同卡塔爾控股一樣。有知情人士透露，如果真係要提高換股比例，嘉能可寧願放棄總額高達650億美元（約5,070億港元）嘅合併大計，同埋支付近3億英鎊（約36億港元）嘅分手費，都唔肯畀Knight Vinke得逞。
Knight Vinke除咗對收購比率不滿，最令佢勞氣嘅係，嘉能可竟然派2.17億英鎊花紅畀Xstrata嘅高級管理層，但係啲股東就少少甜頭都無，Knight Vinke嬲都係正常嘅。