絲絲講場：商交所慶生 預告谷期市
港交所（00388）近期成功打敗海外交易所，奪得倫敦金屬交易所（LME），全力發展商品期貨。畀港交所「按住打」嘅商交所，趁住開業一周年，亦乘機「反擊」，力SELL一下自己呢一年嘅「成績」！
唔經唔覺，搞咗多年至正式開業嘅商交所，自去年五月開始交易以來，已營運一周年，商交所主席張震遠話，商交所嘅美元計價黃金同白銀期貨嘅總成交量已超過160萬張，總成交額超過840億美元。今年六月份嘅日均成交量亦達9975張。
推新商品合約吸客
自開始交易以來，商交所亦增加咗13家新會員，令會員總數達到29家。商交所已步入下一階段嘅發展，將會加大力度吸收全球同區域性嘅經紀商同金融機構加盟，並針對區域同國際市場參與者嘅需求，推出一系列創新商品期貨合約，包括「人仔」計價嘅黃金同埋銅期貨合約、以及其他貴金屬同基本金屬、能源、農產品、商品指數等。