量子基金創辦人索羅斯，個個稱呼佢做大鱷，實情佢有顆慈善心，仲遺傳咗畀阿仔亞歷山大．索羅斯（Alexander G. Soros）。小索羅斯本身已經係亞歷山大索羅斯基金會創辦人，亦係開放社會基金會成員，嚟緊佢會為人權組織Global Witness籌辦大型活動，希望可以提高大家對全球公義嘅意識，連佢老爸都會一齊幫手添。
門票每張盛惠一千美元，佢話有信心可以全場爆滿。至於當初點解佢有咁嘅構思，原來兩年前佢同老爸一齊去印尼，希望可以幫手保衞當地既熱帶雨林，期間認識咗Global Witness嘅主席，聽佢講到組織人員好幾次為咗拍攝罪犯走私木材到泰國嘅證據而被捕入獄，即刻義憤填膺，好想可以出一分力。
小索羅斯又提到，由細到大老爸都幫咗佢好多，除咗支持佢攻讀巴克萊大學歷史系博士學位之外，而且細細個已跟住老爸，見啲國際級領袖，同枱討論世界大事，呢啲機會真係好難得。爸爸投資咁了得，小索羅斯又點睇投資呢，佢話佢同細佬搞咗個小型基金，不過就無乜亮點，總之投資就唔係佢杯茶啦。