富士康（02038）大老闆郭台銘以前緋聞纏身，佢有錢兼口才好，追女仔肯定易，不過，有個人佢追咗廿年至追到，但跟咗佢五年就嗌分手。大家唔好諗多咗，要分手嘅唔係啲明星或者靚女，而係富士康行政總裁程天縱。
早前絲絲已經收到風，程天縱要告辭喇，不過因為郭總極力挽留緊，所以公司唔肯承認傳聞，可惜最後郭總都冇辦法令佢收番封辭職信，公司尋晚終於公布，程天縱想擺多啲時間喺家庭，同改善健康，惟有同公司講bye bye，行政總裁同執行董事個位一併放棄，但生效日期仲要傾。
程天縱喺○七年加入富士康之前，曾經先後做過惠普台灣同惠普中國區總裁及董事、德州儀器亞洲區總裁等職位，可以話縱橫科技業界超過30年。市場有傳郭總非常睇好佢，前前後後「追」咗佢成廿年，先成功將佢招攬到鴻海，做郭總開疆拓土嘅重要左右手，點知幫咗郭總五年就話要走。
程天縱喺呢段期間，啱啱好係母公司鴻海增長最快速嘅時候，公司營業收入由○七到舊年翻咗成倍，仲喺呢段期間大舉向海外擴張，包括越南、俄羅斯、巴西等地都可以見到鴻海嘅足迹，當中程天縱嘅貢獻不少。
估唔到佢舊年十二月臨危受命，接替陳偉良任富士康行政總裁，到依家不過短短半年幾就傳出請辭。
余詩韻