二○○○年，港交所（00388）一話行AMS3.0，即係自動化加上銀行又走埋來同你一齊分餅仔。傳統證券行已經要「突變求生」。突變者，搞搞新意思，咩鬼財富管理、資產管理等等一站式金融集團。求生者，即係成本控制，要用低佣金吸客，又同時喺成本上揸緊，希望創造佳績，等阿爺放水，一湧而上囉。
耀才證券（01428），我諗冇邊位唔知我講咩，廣告足，又有我偶像──大隻佬郭Sir，風雨無間，全天侯與股民同步，點會交唔到功課？純利升近五成，營業額創新高，誰不知一招「供股回馬搶」，股民又點會合皮？不過如果大家睇真少少，佢其實透過今次供股同包銷，交銀嘅股權有可能最高增加至15%，疑似國企行色彩更加強烈。
雖然交銀點都唔會做主要股東，但佢嘅「祝福」已為耀才留下一個大白兔仔印。交銀會唔會食咗耀才，大家真係諗得好遠，不過肯定今次嘅股改，令公眾持股量有機會減到一成四，根據Prof J股權分析，股份高度集中，大股東會活化耀才將自身價值提高，搞唔好耀才機會就較少。
再睇落去，供股嘅錢，主要用來提升孖展融資額度，呢個真係不難理解，耀才嘅策略主要針對即日鮮同頻頻交易嘅股友，加上放數賺息，呢班哥仔梗係希望以低成本，高回報喺股市上血戰，耀才孖展唔夠強點玩落去呀？
香港大學電子金融服務榮譽助理教授 徐燦傑