孖妹Ｓ檔案：想贏？我們先講書
投資講智慧與經驗，但不能急功近利；相反讀書就不同，可以無限貪婪，因為每個字都係打開知識寶庫嘅鎖匙。七月香港書展就到，今日孖妹決定講「書」唔講「股」，並搵來兩位著名基金經理兼作家，同大家探討讀書所領悟出來嘅投資心得。
陸：Look's Asset Management董事總經理兼投資總監 陸東
Think Out of The Box
高妹：基金經理要對客戶負責任；寫作出書就要對讀者負責任。○九年一月，你出版《智者傲行》，去年八月再推《繼續傲行》，其實你出書有咩目標？
陸：希望人可以think out of the box（跳出思維框框），唔好畀個框架控制住思想領域。我認同讀書係一種投資，但即使喺名牌大學畢業，佢只會幫你呃到第一份工，之後得唔得都要靠自己。活到老、學到老，讀書永遠學無止境。讀書同睇年報一樣，都係吸收知識，但大部分投資者未開始睇已經嗌悶，既然你無興趣，就應該即刻走，唔應該做投資。
高妹：讀書講耐性、耐煩，請問成功嘅基金經理係咪都需要呢種性格？
陸：做基金經理好簡單，耐性加分析能力，但好多人做唔到。不少投資者喺上午買股票，下午唔升已經想賣，但間公司架構、業務由上午至下午都無變過，可見大部分投資者都欠缺耐性。
高妹：市場上好多金融書名來來去去都係「教你如何賺到人生第一桶金」、「炒股必勝100招」，你點睇呢類書籍？
陸：呢個世界係咁㗎喇，好多人買呢啲get rich quickly（快速致富）嘅書！但我無睇過，唔識評論，我剩係知道投資唔可以短線。如果你要投機，咁不如過大海喇！我唔覺得股市係個賭場，要記住任何炒買炒賣都係賭錢，所以要提醒自己，永遠唔好做一個低質素嘅人。
高妹：你堅信價值投資，但投資者經常被波動市況嚇親，投資策略明明長都變咗短。
陸：長線投資就係唔好畀股價短期波動影響，但唔代表買咗隻股票就忘記佢，反而要睇間公司仲有咩發展前景，跟進財務報表及基本因素變化。當你決定買呢間公司，除咗undervalue（低估值）外，原因係佢規模大、管理層質素好，但要畀時間佢證明，如果過咗半年或一年都未達目標，咁就要再檢討，如果真係揀錯股票，就認錯沽出。
閱讀可擦亮你的思想
高妹：你屋企個書櫃有三、四千本書，其實讀書有咩好處？
陸：讀書可以polish（擦亮）你嘅思想，可以shocking your mind（震撼心靈），尤其係歷史書。如果要好好掌握將來，就一定要掌握現在，而掌握現在，就必需明白過去，所以讀歷史書好有用，讀工具書可能會悶，但可以polish技巧。
高妹：好書有助增長智慧，不如你推介幾本好書畀大家呀？
陸：Paul Kennedy嘅《THE RISE AND FALL OF THE GREAT POWERS》、柏楊嘅《中國人史綱》，兩本書都寫得幾好。睇歷史書，你會知道咩叫做貪污、用人唯親、少數既得利益者控制最大權力，掌控經濟局面。雖然歷史會隨時間演變，但歷史不停影響今天，而今天發生嘅事亦奠定將來嘅結果。
錢：著名對沖基金經理 錢志健
彩兒：聽講你細路仔時，最鍾意睇啲青少年讀物，咁大個咗係咪睇金融讀物呢？
錢：讀書可引發人嘅想像空間，可以shape（發展）一個人嘅品格。不過金融投資書本本差唔多，投資者唔使睇太多，好似我寫《金融圈內》、《亂世對沖》，都係寫人嘅故事為主，寫交易員嘅心理質素，因為人係生嘅，技術係死嘅！
彩兒：但投資者短炒時成日都睇技術分析，又真係賺到錢喎！
資金過多出事 睇書唔會
錢：投資策略可分三種，長短倉（Equity Long/Short）、宏觀（Macro）及電腦程式（CTA），除咗CTA外，其餘兩種都係由人去決定，金融操作世界充滿好多war story（戰爭故事），個個都有血有肉，睇每個人點打法（操盤）。而當中神聖不可侵犯嘅，就係條交易資金曲線，因為過多資金可以培養泡沫，爆咗就好大件事。喺讀書世界，睇愈多書愈好；但喺金融世界，就要遵守規則，例如做足止蝕。
要選擇能啟發到你的書
彩兒：咁讀書可以培養投資致勝嘅性格嗎？
錢：香港本身唔太注重推廣文化藝術，最多人睇嘅就係賺錢（投資）書同埋八卦書。○七年市旺時，金融書大賣，去到○八年金融海嘯，呢啲書就死晒！我覺得，揀書好重要，大家要睇啲可以wake you up（喚醒你）嘅書，可以啟發思維，為思想帶來衝擊嘅書。
彩兒：嗯！投資同投機有所分別，書本都有好壞之分。
錢：其實聖經都包含投資道理，聖經有云：「不勞而得之財必然消耗；勤奮積蓄的，必見加增。」自小我就係基督徒，但長大後都曾經迷失於金錢世界，覺得金錢和權力大於一切，後來眼見美國發生九一一、科網股爆破、沙士、金融海嘯等，先發現金融世界內，有啲好叻嘅人比我更加貪婪，直到30歲之後先識覺醒。我成日講，自己以前係市井之徒，現時進步咗，但最多都係市井信徒。
彩兒：讀書可以去除人類嘅無知與偏見，有助提升智慧與思考力，等我以後都多啲喺書中尋寶先！
錢：早前市場爆發民企風暴，不少民企被踢爆醜聞，又有研究報告揭發疑似做假帳。記住，每間上市公司都係由人去創造出來，因此管理層嘅人格好重要，當企業擁有良好管治，前景先有發揮空間。而讀書可以告訴我們不少人生道理，學習如何成為更好的人。
陸東推介
書名：THE RISE AND FALL OF THE GREAT POWERS
作者：Paul Kennedy
內容概要：本書總結公元1500年以來大國興衰歷史，論述文藝復興以後的國家或國際力量，是一部論述國際政治、經濟、軍事外交和歷史的書籍。
書名：中國人史綱（全集）
作者：柏楊
內容概要：此書為柏楊重要經典作品之一，也是他在獄中書寫的一部中國通史，內容從盤古開天地寫到八國聯軍。
錢志健推介
書名：ZOMBIE BANKS
作者：Yalman Onaran
內容概要：此書深入探討殭屍銀行的秘密，以及它對全球經濟所帶來的危險、傷害與影響。
書名：THE BIG SHORT
作者：Michael Lewis
內容概要：本書探討○八年金融海嘯的事情，作者更以小說情節方式，描寫金融海嘯背後，四段傳奇的真實人物的貪婪故事。
高妹、彩兒
若有料報畀高妹同彩兒或有嘢問，可電郵money.biz@opg.com.hk