《易經》有云：「孤陰不生，獨陽不長」，幾年前嘅無敵光環板塊──零售股，全部都學咗神鵰大俠一樣，隻隻都「黯然消魂」，派親業績，全面都清一色盈利倒退。Prof. J近期行尖咀，發覺有番少少空間感，去到澳門「打的」易咗，證明眼球和「打的」嘅指標確係零售表現嘅印證。
我叫佢主席做「服裝界伊麵」嘅包浩斯（00483），就啱啱公布咗業績，上年度賺七千幾萬，盈利下跌咗三成幾，都咪話唔犀利。睇真啲，生意多咗，但又盈利倒退，唔使講梗係成本上漲。
一講到成本上漲，唔使問梗係租金狂加，零售股食硬嘅負面因素無計，大家都知，呢種成本佢自己都話唔到事，任人宰割都係無計可施。「伊麵」主席講笑話遲吓可能所有地舖都關門，全部變晒樓上舖或者網上購物，都似乎要喺呢個時候諗諗計，唔好覺得網上購物唔掂，Prof. J老友──「潮人風」最鐘意去韓國網站Gmarket買嘢，買到佢後生咗十年，「伊麵」都要諗一諗計先至可以突圍而出。
另外，阿爺國經濟行慢咗，所有喺中國狂開舖都全部要「冚旗」，依家睇落，幾年前個個都話搞擴張，擴張到而家全部關門大吉，短時間都咪話唔麻煩。最慘係派開特別股息突然唔派，收開咗無得再收，情緒低落，又好難怪股民唔「合皮」嘅。不過，亦都預視嚟緊嘅業績會好似我日本老友一樣──「麻麻夫夫」。睇怕「伊麵」主席要諗諗計，令包浩斯風雲再起，繼續追蹤，出發。
香港大學電子金融服務榮譽助理教授 徐燦傑