歐元區已經去到「分家」的臨界點，大阿哥德國對歐盟想救又不想救的姿態，已引起一眾歐豬國不滿，隨時反過來孤立德國，集體向德國攤牌。備受Millennium Wave Investments總裁John Mauldin讚好的投資研究公司GaveKal，在德國進退問題上，一眾分析師立場上都出現嚴重分歧，叫外間更難睇清大局。
GaveKal旗下的分析師Anatole Kaletsky稱，德國一直不太願意出錢大力拯救歐豬國，對援助銀行又條件多多，還極力反對有望解決歐債危機的歐元區共同債券，拯救歐元區最大阻力其實是德國才真！Kaletsky覺得歐豬國希臘、西班牙、意大利、法國與其被德國牽住鼻子走，遲早被德國逐個逐個逼向牆角，倒不如團結起來對抗德國，爭回話事權，請德國離開歐元區，不要再阻撓將歐元貶值。
不過，分析師Francois Chauchat就有不同睇法，佢認為向德國逼宮絕非明智之舉。首先，歐盟要經濟持續增長不是靠將貨幣貶值和不斷印銀紙就可以做到。就算歐豬國成功逼走「共同敵人」德國，亦不代表他們可以繼續團結一致解決歐盟經濟問題。何況一旦德國脫歐，由歐元轉用馬克，不但會蒸發過萬億歐元，更會嚴重打擊德國出口，對一個出口佔其GDP45%的國家來說未免太沉重。
大家睇完兩位分析師的意見都可能會相當矛盾，但李宏博相信有一點大家都不會反對，就如Mauldin所言，德國一係力保歐元區，一係讓歐元區瓦解，只不過無論揀A餐定B餐，德國都要用天價去埋單。
WORLD 李宏博