港交所（00388）豪花167億港元，終與倫敦金屬交易所（LME）完婚，是政治任務又好，抑或高管見延長交易時段全無效果，為名垂青史逼住隔山買牛都好，過百倍市盈率娶LME，市場反應之差都算少見。金英證券以Kiss of Death（死亡之吻）形容交易，大部分投行都認為出價過高，紛紛調低港交所目標價。
讓邢理強講句公道話，一如其他無大股東的上市公司，管理層要向董事局及股東交代，港股目前市值同倫敦及A股叮噹馬頭，爭坐全球第二把交椅，全球40大上市公司，唔計無人玩的納指七雄，港股基本囊括了當中7間。要達到市值再發育，交投更暢旺的目標，無得揀下，僅得購併一途；尤其講到估值，環球交易所中，港交所名列前茅，倘齊齊印公仔紙付款，以佢最具優勢。
港交所由二月高位跌了兩成六，輸大市一條街，本來出價等於港交所市值七分之一左右，唔賴得晒尚未入門的LME佗衰家。港股成交愈玩愈縮的問題更大，睇番二月港股日均成交687億，五月縮到552億跌近兩成，近期持續400億上落，直頭水瓜再三打狗一樣，就算唔係買貴貨，面對這種市況，港交所今年盤數確係難以樂觀。
靠佣金搵食的經紀行更是寒到入心，統計數字顯示，C組經紀今年市佔率明顯流失，去年十一月至今，僅得二月叻啲有10.84%，其餘六個月均都不足一成，五月跌至9.09%，差不多四年新低，細行老板同港交所一樣吊緊鹽水。
邢理強有位投行交易部老友，見面時同樣是長嗟短嘆，話大行表面條數係靚，但整個市場萎縮緊，計落佣金仲係比一○同一一年縮咗，市況唔好，對沖基金客都更精打細算，部分毋須sell side經紀服務的，好似電腦套戥盤，同高頻交易都要求減佣，長此落去，肯定中環一帶，大信封唔夠用咁話。
INVEST 邢理強