人稱「公職王」嘅王英偉今年「七一」有「新任務」，但今次就唔係政府對佢又有新任命，而係佢嘅「正職」新昌營造（00404）同旗下新昌管理（02340）宣布，王英偉將喺七一起調任為兩家公司嘅主席，並且出任新昌營造嘅行政總裁，正式以舵手身份帶領公司嘅發展。有關安排亦再次顯示，王英偉全力策劃嘅江西省共青城發展計劃，正按計劃進行。
王英偉○七年加入新昌係因為觀瀾湖已故大股東朱樹豪力邀。朱樹豪兒子朱鼎健去年繼任新昌系內兩公司嘅非執行主席後，亦曾經同內地媒體講過，自己目前嘅最主要任務係喺觀瀾湖嘅家族生意基礎上進行「二次創業」，努力將「觀瀾湖」品牌拓展往全國。而按新昌尋日嘅公布，喺今次嘅管理層變動後，朱鼎健只會繼續留任新昌營造非執董，與此同時新昌營造嘅梁廣灝喺七月一日退任公司董事總經理後，亦會喺十月現有服務合約介滿後，辭埋公司嘅董事職務。
翻查新昌嘅股權資料，朱樹豪嘅家族成員目前仍持新昌三成多嘅股份，而王英偉喺公司嘅持股則不足2%，即使計埋佢攤佔部分權益嘅新峰公司，王氏喺新昌嘅持股亦只有15%在右。但其實早喺去年新昌公布用現金、發行新股及可換股債券形式，以32.48億元作價向副主席王英偉同新峰收購遼寧、江西兩幅共青城地塊時，公司已經表明喺交易正式完成後，王英偉同新峰將可以成為新昌持股三成嘅大股東。而新昌今次嘅人事安排，相信亦體現咗呢項收購嘅進展。