所謂「蛇無頭而不行」，早排中國金石（01380）嘅一班董事會高層，走吓一個走吓一個，七個人嘅董事會，依家只淨番三個人。自上任行政總裁（CEO）陳濤喺六月頭因為健康理由辭任之後，公司一直物色人選，到星期三晚終於委任張鴻做公司嘅CEO。絲絲睇番通告都唔知，現年43歲嘅張鴻，原來佢同時間都係生產保健護理產品朗力福（08037）嘅主席兼執行董事。
中國金石早排負面消息不斷，今年四月底，公司的主要業務張家壩礦山被指遭當局叫停，股價隨即大跌，之後喺董事會入面，亦好少有咁有三個執行董事喺重選嗰陣以超過99%比例唔獲通過，而其後董事同埋高層仲一個個咁「跳船」，都咪話唔驚。走晒樣其實唔單止佢哋嘅人，間公司喺舊年三月先上市，當時招嘅股價係2.25元，但係依家就得番0.265元，即係得番個零頭左右，小股東真係欲哭無淚！
中國金石係大理石生產商，同保健護理產品關係似乎大纜都扯唔埋，而通告入面亦無對張鴻太多介紹，只係話佢擁有超過20年喺證券行業嘅經驗，而喺今年五月，張鴻打理嘅公司朗力福旗下嘅產品中山膠囊就被檢出鉻超標，或會被吊銷中山膠囊藥品生產許可證。唔通張鴻係公司危機處理嘅專家，咁就真係要拭目以待咯！
另外，嚟緊七月頭中國金石連獨立非執董鄧惠青都會走埋，為咗填補番個位，公司亦同時宣布委任梁綺旋做公司嘅獨立非執行董事、審核委員會主席、提名委員會成員同薪酬委員會成員，為期三年。