股神巴菲特一向對旗下公司嘅運作採取不干預政策，但今次罕有地出手炒咗子公司藝術塗料商Benjamin Moore & Co.（BMC）主管Denis Abrams（亞伯拉罕），實在令人意外。外界對股神怒炒高層報道嘅版本不一，更加惹人生疑。絲絲亦發覺事非尋常，但股神呢位全球公認嘅世界第一號慈善家，絲絲仍會投以信任嘅一票。
股神為何大動肝火呢？根據外國報章所講，股神之所以炒亞伯拉罕嘅原因係佢同亞伯拉罕喺打理BMC嘅品牌策略同銷售渠道上出現重大分歧，而且更有報道指，喺亞伯拉罕嘅領導下，BMC已經做錯幾次策略上嘅決定。
至於炒亞伯拉罕嘅導火線，有指係之前BMC一個遊船河活動，原本係一眾高層一面遊山玩水，一面傾傾點樣搞好BMC嘅聚會。但對於呢趟船河活動，股神已經否認。而阿伯拉罕就提供咗一封解僱信畀傳媒查閱。傳媒相信實情唔只係咁，而且有長期留意巴菲特消息嘅評論員認為以股神嘅性格，若只係意見分歧不足以令佢炒人，佢相信依家所知道嘅只係故事嘅一小部分。呢單炒魷事件有好大疑點，唯一可以肯定嘅係，今次股神表現出佢係個手起刀落，絕不手軟嘅老闆。
雖然畀人質疑無情情炒人魷，但股神為善最樂，佢鍾意唱歌已經係公開嘅秘密，亦有多次公開演出嘅經驗，股神今次就搞搞新意思，聯同另一位慈善家，樂與怒樂隊Jon Bon Jovi一齊拎住夏威夷小結他唱二重唱“The Glory of Love”。股神喺唱之前仲好風趣咁話，「呢啲係一生人一次嘅機會，亦都係做一次就夠o架啦！」
樂隊嘅主音Bon Jovi喺上年《福布斯》雜誌「世界樂善好施明星」排喺榜首，佢喺美國間慈善餐廳無特定收費，食客可以選擇用時間或者俾20美元享用三道菜。香港都可以效法吓。
余詩韻