Market Insight:渣打未到買貨時

畀高登仔封為「神劇」,卻晚晚被師奶罷睇的「心戰」,今晚終於大結局,下星期成班改晒姓賴的魚缸友,無藉口篤住秋官話佢佗衰家。雖然N年前丁蟹在「大時代」,隊散期指搵錢深入民心,不過大家真係唔好當真,最好笑居然有大行陪股民癲,出埋報告話個市仲未跌夠。

大行指睇番「心戰」五月開播以來,港股唔單止無跌,恒指由18,951升至19,025點,仲有74點進帳。古勝覺得,無論「秋官效應」抑或「秋官效應恐懼症」都係時候告一段落。

發歐元共同債券機會渺茫,市場期待歐盟峰會有其他良策,為當前危機消災解困,外國傳媒預測,歐盟最大可能推存款保障,可惜,措施估計最快要年底至落實,俗語話遠水不能救近火,歐豬國債插水,幸運之神眷顧西班牙,前晚「歐債盃」射贏十二碼,但改不了國運,十年債息連抽四日,執筆時又見7厘危險水平,氣氛直接衝擊歐洲股市,拖累結算日港股,在三點後急轉直下,恒指最後一小時倒跌151點報19,025點,六月期指以19,180點作結,七月期指插到19,000點收,低水25點,港股不脫行三步退兩步的悶局。

銀行保增長確不易

回歸送禮股,開始見基金減磅手影,中銀香港(02388)跌2.1%收23.25元,二線本地券商股跌幅唔細,國泰君安(01788)跌4.5%報2.76元,海通國際(00665)跌7.1%報2.73元。淡市中,醜聞草木皆兵,雨潤(01068)被指挪用公司資金投資房地產,股價急挫12.7%報6.51元,創三年半新低,淡友予取予攜。

內地基建及建屋需求減少,水泥價格上半年未見底,華潤水泥(01313)發盈警,本來相對去年上半年的盛況,盈警是意料中事,仍令股價跌5.5%收4.45元,龍頭股海螺(00914)跌2.6%報20.6元,反觀海螺五、六月沽空一直唔少,六月中旬,日均沽空佔成交比例更維持三到四成水平(股價在21至23元之間),淡友博咩?唔使畫公仔畫出腸喇。

五月香港新做按揭210億元,按月升0.8%,樓價高企,外圍經濟動盪,本地銀行傾向少做少錯策略,無在低貸款需求下減息,反映銀行資金成本的綜合利率維持0.39厘水平,大行估計今年本地銀行淨息差可以保持在相對穩定水平。

日前穆迪一口氣將15間銀行降級,對銀行股投資者而言,或者今日無驚已算喜,渣打集團(02888)半年結前業務狀況匯報,平淡地預告上半年稅前盈利收入,將錄得高單位數增長,今時今日銀行業風高浪急,確有得來不易的感覺。值得留意,第二季至今渣打股價累積跌15.4%,較之在歐美飽歷風霜的滙控(00005)同期0.5%跌幅更大,多少反映投資者心目中,渣打即使避得開歐債危機的暴風眼,卻無法在環球經濟放緩的大環境下獨善其身。

綜合街外預測渣打半年及全年分別會賺26.26億及52.24億美元,一二年市盈率9.8倍(十年歷史平均15.6倍),一間保輕微增長,兼未受歐債危機直接衝擊的銀行而言,實在想不到批評的說話。但估值高低見仁見智,悲觀者如認為未來一段時間沒有增長,10倍市盈率都唔算平,對憂心環球銀行業有十多二十年苦日子的,或許渣打Perpetual債收7厘多一年(相對股息3.86厘)會更開心,當然,極端到驚世界末日,都係買定幾包米,兩條金條傍身好啲。

六福累跌蟹民遞增

近日金飾股陸續派成績表,周大福(01929)業績符預期,而六福(00590)年度亦多賺五成,但兩者股昨日均低收作結,反映喺國際金價走低,以及個人遊消費增長放緩下,金飾股估值仍受壓。當日周大福招股定價進取,故自掛牌以來,冇咩點威過,加上股壇大鱷本色眾所周知,相信股價邊跌邊買嘅散戶唔係咁多。

反觀六福,股價自52周高位46.15元回落,唔少散戶見跌三成「抵買」、跌四成仲「值博」,點知可以較高位最多累跌六成八,搞到通街蟹貨!

點解六福股價咁跌法,究其原因,除咗同業同樣面對嘅金價同零售市道因素外,據聞六福嘅金價對沖比率僅20%,遠較周大福嘅100%為低。喺金價上升嘅日子,六福自然嗒糖,但換着金價持續下跌,加上銷售增長放緩,六福盈利受負面影響會較大,古勝相信嚟緊嘅中期業績,投資者可看過明白。所以,睇準金價反彈博金飾股,也許六福較合炒家胃納,但若然撇除金價因素,齋從銷售網絡同盈利質素出發,也許板塊中可找到其他更好嘅選擇。

古勝

搵樓18即睇最新樓價走勢、最全面地產新聞及筍盤情報

「Money18免費即秒股票報價網站」現推出8升級功能,財經資訊,實時實發!