聯想（00992）創辦人柳傳志可謂近年中國最成功嘅企業家之一，佢不但一手將聯想打造成全球第二大嘅PC廠商，仲創立咗神州數碼（00861）、創投基金君聯資本、私募基金弘毅投資，同埋房地產企業融科智地。
佢尋日嚟香港攞獎，有人見柳總都有搞埋房地產，就問佢依家內地樓價咁高，柳總可唔可以好似當年令電腦價格「平民化」咁，令樓價都「平民化」。
相信問呢個問題嘅朋友，都有啲搞笑成分，不過柳總就好認真咁回答。
佢話，雖然大家成日話樓價過高，不過要分清楚「有房住」同「有住房」嘅分別，佢覺得令到國家人人「有房住」係應該，不過如果為咗令人人「有住房」，即係買得起樓，而夾硬壓低樓價，就會對經濟有壞影響。
雖然佢係講心底話，但咁講唔怕得罪人？柳總話呢啲說話唔敢喺大場合講，免得罪想樓價跌嘅人。