中國燃氣（00384）喺內地畀好多油公司垂青，除咗中石化（00386）想染指中燃之外，中石油（00857）久唔久都傳話想爭埋一份。其實，中燃唔係樣樣都咁被動，據聞佢哋同中石油爭緊地盤！
話說中燃揸住南京江北地區嘅天然氣經營權，但中石油母公司下面嘅昆侖燃氣，都好想踩入呢區，於是同當地兩間公司簽約，供氣畀對方。中燃梗係唔順氣啦，仲向政府投訴。
同中燃搶客嘅係昆侖燃氣揸住45%股份嘅南京星桐公司，呢單搶客風波擾攘咗幾個月，依家都未搞掂。咁點解嗌交嗌咁耐呢？內地傳媒話，星桐話供畀嗰兩間公司嘅天然氣係生產原料，唔抵觸中燃嘅專營權，但中燃就反駁，話有證據星桐畀嘅氣係當燃料用，咁就自然踩中中燃喺當地嘅業務啦，所以依家要同政府投訴。
不過政府未落決定前，星桐暫時都係話之你，依家仲起緊條燃氣管道。中燃起初聞訊都嚇咗一跳，喺南京嘅分公司即刻派人阻止，有報道話雙方人馬差啲大動干戈。鬼咩，管道燃氣項目喺內地咁吃香，睇吓中燃股份幾多人爭就知啦，不過正所謂和氣生財，大家唔好因為搶客傷和氣方為至上！