絲絲講場：香港富豪少咗17%

據負責呢份報告嘅RBC亞洲市場嘅阿頭陶士力話，香港舊年嘅高資產淨值人士（財富達100萬美金或以上）數目，大跌咗17.4%，跌幅係除咗印度之外最大，主要原因係舊年港股市值大跌咗16.7%。

內地增半成 全球第4

絲絲睇到都有少少嚇親！陶士力安慰絲絲話，唔係單單股市影響嘅，歐元區危機對香港去年出口都好大影響，令富豪人數因而大減。

睇完香港就睇吓中國啦，陶士力笑笑口話，中國嘅表現ok啦，升咗5.2%，企穩全球第四嘅位置，有56.2萬個高資產淨值人士，不過距離第三位、有95.1萬個嘅德國都仲有一段距離，第二同第一就分別係日本同美國，數字係182.2萬同306.8萬。

咁樣，中國未來前途又會點呢？陶士力話，中國去年實質GDP雖然話就話跌至9.2%，但都係亞洲區內表現最好嘅其中一個嘞！咁又係嘅，好似花旗嘅報告就估計到2015年，內地信託基金管理資產規模將會由目前嘅2.3萬億人仔，升到6.8萬億人仔，佢哋仲預計，環球投資者投入中國市場嘅資金比重，未來可能會增加十倍以上。

余詩韻