希臘神話再次降臨歐國盃，希臘奇迹地晉級八強，唔知奧林匹斯山上嘅希臘眾神會唔會再度發功，令到希臘喺八強戰再創奇迹，將德國踢出局呢？不過，李宏博諗番轉頭，希臘國民其實家陣更加擔心以德國為首嘅歐元區，會踢希臘出局，到時真係慘過輸一場波。
芝加哥大學商學院教授John H. Cochrane接受彭博電視節目《In the Loop》主持人Betty Liu專訪時，提出一個對希臘「超筍」嘅建議，大叫希臘唔好脫歐，索性賴死唔走。雖然希臘拖欠債務會搞到好多希臘銀行破產，但對歐洲整體而言，殺傷力遠低過希臘退出歐元區並觸發另一波金融海嘯，實行要希臘體驗「留低要比離開的勇氣更大」。眼見希臘民眾湧去銀行提走存款，寧願將錢藏在床下都唔放入當地銀行，都知道佢哋內心幾咁不安，就算唔使被人踢出歐元區，希臘政府都要盡快處理好債務問題，「唔使急，最緊要快。」
不過，普林斯頓大學教授Harold James就有唔同睇法，想同希臘講一句「離開是為了走更長的路」。雖然上周日嘅選情，已表明希臘人好想留喺歐元區，而且脫歐嘅短期影響唔講得笑，但係「做大事要睇長線」。James覺得歐盟領袖唔可以再見步行步，令到歐債問題繼續拖延下去。歐盟需要提出長期改革方案，實現財政一體化，歐洲聯盟條約如果唔變都好難成事，咁樣就可能要希臘犧牲一下。不過，James都有安慰希臘，話唔係永遠離開歐元區，只係暫時離開一陣，等到佢哋嘅競爭力提升番，歐元區大門隨時為希臘而開。
希臘國會重選結果周一已揭盅，支持緊縮政策的兩大政黨取得勝利，有望組成聯合政府，暫時解除脫歐嘅炸彈，歐洲各國鬆一口氣。但希臘之後喺歐元區去與留嘅問題，可能要再勞煩一班希臘天神合力諗計仔，先可以真正殺出一條血路。
WORLD 李宏博