航空業呢十年，都經歷過幾次浩劫，今年有幾慘情相信唔使金占士解釋，但點差法？有條數可以同大家分享吓，就知道航空公司到底有幾慘。
內地航空業嘅走勢，同境外航空公司大致相同，即使內地嘅經濟幾咁堅挺，好多營運因素，冇辦法切開。有位內地航空公司咁樣形容目前慘況：飛機每公里嘅價錢，平過坐的士！
由北京出發飛往美國紐約，來回合共2.2萬公里，經濟客位網上報價僅為8,500元人民幣，拉勻每公里為38.6仙。喺北京call部的士，每公里收費兩蚊。金占士老友駁故，話四個人一齊坐平好多，但結論又唔係喎，兩蚊除以4人，平均每公里都要50仙，都係貴過坐飛機。
飛機票咁平，皆因全球經濟不景，需求自然減少。金占士記得喺「沙士」期間，機票係半賣半送，○八至○九年嘅金融海嘯期間，間間航空公司都蝕錢，最近國際航協理事長湯彥麟，調高歐洲航空業今年嘅虧損預測至11億美元，比今年三月時預測嘅6億美元大幅擴大。其實又點只歐洲，其他地區嘅航空公司都係出晒血。就算油價跌咗好多，早已做咗航油對沖嘅，都攞唔到着數，反而對沖成本貴咗至真。
金占士