金融市場呢期咁chok，好多國際性投行同投資者都難免損手爛腳。一班愛爾蘭修女因為債券損失，向摩根士丹利提出官司，追討賠償。
原本喺嚟緊嘅星期一開審，據聞可達成和解，總算為金融市場帶嚟正面嘅消息。
呢單官司源於○五同○六年，有3間神職機構一共132名愛爾蘭修女，連同其他投資者買咗價值2,000萬歐元，由土星投資公司發行嘅「土星債券」，而呢啲債券係同德國德累斯頓銀行債券掛鈎。
投訴人向法庭話喺○九年初德累斯頓銀行被降低咗評級，觸發強制性贖回時佢哋唔能夠贖回呢啲債券，指控話大摩一直喺度等德累斯頓銀行債券價格回升，令自己唔會受到損失時先去贖回，但咁樣就令到投資者受到巨大損失。
呢單案原本喺星期一開審，不過法庭為咗畀雙方有更多時間展開和解談判，而決定延期審訊，而代表原告嘅律司更話預期好快可以達成和解。雖然修女同大摩之間嘅官司有望告一段落，不過大摩同愛爾蘭券商Bloxham之間仍然有官司要打。