絲絲講場：首域拉閘代理絕處逢生
地產代理行嘅分行數目，一向都係樓市嘅寒暑表，高峰期曾經有10間分行嘅首域置業，最近傳出結業消息，仲話尋日係last day添。尋日絲絲專登落去分行睇吓，見到佢哋執拾細軟，不過，天無絕人之路，據聞有其他代理行，會接收部分經驗員工。
首域奧運站富榮花園有兩間分行，其中一間細舖已經人去樓空，喺中午兩點左右，另一間可以坐到近廿人嘅大舖，都只得2至3個員工，個別正在收拾，有員工同絲絲講：「今日番工嘅等放工」。
新盤爭客 二手失色
奧運站都算係二手交投大跌嘅重災區，有代理話，以前奧運站每個月閒閒哋有過百宗二手買賣，但上個月全月都只係錄到35宗，今個月暫時更只得15宗，而月中打後已經連續4日都未有成交。
冇法啦，市場好多購買力，比新盤吸晒，二手交投自然大跌，有地產代理暫時離場都不足為奇，據聞首域仲有一啲自置嘅舖位，將保留長線收租。
有鄰近奧運站代理爆料，近日已約見部分首域置業員工，希望吸納部分有經驗代理，但人數仍未決定。