金融投資呢個圈子，有「沙紙」傍身自然勝人一籌，好似做分析員或財務顧問，最好考埋CFA同CFP個牌，但對住超級豪客嘅私人銀行家，反而冇牌可攞，因為香港仲未有一個認可嘅牌照可考。
遲啲就唔同喇，全港首個「私人銀行家資格認證」認可課程快將推出，到時成個行業就更加規範化。
香港一直都係亞洲最具競爭力私人銀行中心之一，金占士之前都有過呢個疑問，點解佢哋對住身家億億聲嘅豪客，反而唔使攞正牌，莫非呢啲富豪嘅財經知識過人，唔使佢哋講解？
又唔係喎，金占士經常見到報紙報道，有啲有錢人同銀行打官司，話唔明乜嘢係Accumulator，又點會買呢？一切都係私人銀行家自把自為幫佢哋買，講咁多嘢，其實係唔肯找數。
香港同新加坡喺呢方面嘅發展，鬥到火紅火綠，香港要有gimmick至得架。依家愈來愈多大陸富豪幫襯新加坡嘅私人銀行，香港真係要急起直追。
據聞香港財務策劃師學會下個禮拜搵咗金融培訓師古致平嚟香港，同業界交換意見，到時順便介紹吓全港首個「私人銀行家資格認證」。
聽落呢個課程係自願性質，唔係強制要讀。金占士反而覺得，如果私人銀行家要攞牌至可以做生意，對香港未嘗唔係好事。
金占士