MARKET INSIGHT：江西銅業現價唔怕買

常言道，壞消息入市，好消息出貨，昨日港股收市仲保得住接近兩百點升幅，對好友來說也應心滿意足，尤其港股早於上周，已比外圍偷步做好。

中午飯聚，幾個外資行銷售部朋友長嗟短嘆，諗住希臘選舉擺平後，生意點都會有番起色，殊不知成朝坐住發白日夢，基金買盤寥寥。

放大圖片

放大圖片

查實，港股成交由第一季六七百億元，近期已縮水到間中連四百億都無，可以想像，減去兩三成窩輪搓波盤，捱貴租兼人工高的外資證券行，唔嗌救命有鬼。老友話近期佢哋雖然未有大鑼大鼓裁員裁到上報紙，但多間外資行一直陰啲陰啲派大信封，隔個星期有一兩位同事「被消失」，睇怕唔使幾耐，中環一班饞嘴賓架聚集的「八部半」、「龍X軒」，唔使再預早幾星期訂位咁巴閉。

分段入貨減風險

當人人以為希臘脫歐，港股由18,056點起步，到昨日證明無事，由19,578點來個反高潮，高低位累積反彈1,522點，技術上出咗大陰燭認真肉酸。不過，恒指五月初開始受歐債危機，加埋中國經濟放緩的陰霾籠罩，由21,385點跌落18,056點，關鍵是0.5反彈阻力位19,720點（50日線相當接近在19,744點），至少後市要重返這阻力樓上，先算穩陣。

展望今個星期，先後有G20峰會及美國聯儲局議息，外圍消息多，萬一默克爾夫人拍枱，講唔掂數，跌番三五七百點絕對唔出奇。想入市唯一選擇，乃透過分段入貨減低風險，切忌孤注一擲。

早前建議看官們可開始留意落後的金屬板塊，事實自五月中旬，這批股份每次回吐低位，都有上移現象，大孖沙的沽空也都收斂不少，有收貨手影。

客觀睇，內地工業需求相信十分接近政策周期谷底，中央預計在不久日子，會推出振興基建、製造業及出口的措施，這批估值處於歷史下限的爛銅爛鐵，一旦出現技術反彈，實在不容小覷，而且，環球經濟不振，歐美央行有相當充分理由，再推量化寬鬆措施，近期國際銅價由高位每噸8,700美元回落至今個月在7,200至7,300美元水平，經已有跌唔落情況，相關板塊看來有留意必要。

古勝心水之一係江西銅業（00358），對比幾隻今年上半年，九成九業績要見紅的鋼鐵冶煉股，最大優勢是今年業績大致可保持。江銅本身集採銅、冶煉及加工於一身，是內地最大銅生產商，也是全國擁有最多銅儲的企業，坐擁近390噸黃金儲量權益，故工業需求增加，或者資源價格向上，均可直接受惠，唯一缺點，是一一年高產能及銷售增長，今年難免放緩，但也是大行預期之內。

燈飾股只宜短炒

江銅股價由二月高位22.7元，累積調整兩成三，跌幅大於期銅一成四跌幅。研究機構Brook Hunt指出，明年全球銅產量增長低於2%，隨後更可能下滑。新礦產量供應減少，各國央行寬鬆政策，記得銅價○九年海嘯後曾出現反彈，當時江銅市帳率從由谷底0.75倍反彈至接近2.9倍，現價17.44元計，一二及一三年預期市帳率只係1.11倍及1倍，會否照辦煮碗？難講，但估值同十年平均1.45倍比較，有23.4%及31%的折讓，現水平銅值得作中短線收集，博估值壓縮後的一次先來個修正。

主流中資板塊都經已炒咗一浸，炒家正尋覓新嘅炒作對象，昨日開始將視線轉移至落後板塊，個別環保燈飾股有異動，如真明麗（01868）及陽光能源（00757）分別升11%及8%，但見到近期受負面消息影響嘅雷士照明（02222）就冇變動。少咗隻龍頭股起動配合，加埋整個板塊成交都唔算太活躍，相信炒風難持久，即日小注跟炒尚可，過夜就可免則免。

古勝