絲絲講場：交銀宣傳新私貸助「尋夢」
每個年輕人都想追尋夢想，交銀香港新推出嘅私人貸款計劃，就用實現夢想為題，拍攝咗一段宣傳片，仲請咗林子祥嘅公子擔任演員添，尋日交銀香港就請咗絲絲同一班朋友，同聚中環一間高級影院，齊齊食爆榖睇宣傳片首映。
宣傳短片大概長三十分鐘，由獨立導演麥婉欣執導，故事講述一對年輕男女，成為鄰居後發展友誼，男主角喺女方鼓勵下，借入貸款完成創業夢想，成段短片充滿青春氣息，絲絲睇完都覺得成個青春晒，導演應記一功！
目標幫年輕人達成目標
麥導演話，成個project只係用咗兩個星期籌備，時間非常緊迫，真實拍攝時間只有兩日，唔講唔知，原來兩個後生演員都係第一次拍戲，唔怪之得整段短片都畀人新鮮嘅感覺啦。
交銀香港副行政總裁陳霞芳尋日都有出席首映，佢話希望透過筆貸款，幫助到客戶得到資金，完成夢想，但係就強調唔鼓勵借錢消費，短片將會被上載到YouTube，各位想感染一下青春氣息，不妨去睇一睇。