上市公司通告嘅最底部，都會列出公司董事會成員名單，不過大家一般都係睇完通告內容就算，好少會理嗰個名單。之不過，八卦嘅絲絲就發現到，創維數碼（00751）尋日出咗份通告，話之前一日出嗰份有關業績刊發日期嘅通告上面，個董事會名單係錯嘅。
究竟名單錯啲乜？嗰份新通告又冇講，絲絲惟有自己搵。原來之前嗰份通告有兩點錯漏，分別係多咗位丁凱女士同少咗位施馳先生。
絲絲就繼續尋根究柢，再搵創維嘅舊通告研究吓。原來喺今年2月13日，創維發咗通告話丁凱女士已經病逝！至於施馳早喺舊年7月15日已經加入董事局，唔明點解佢哋最新嘅通告冇咗佢個名。絲絲搵唔到相關人士解答，但估計有人一時唔小心，copy & paste 咗舊年7月15日前嘅舊通告，所以擺咗個烏龍。總之，呢兩個錯誤都係不敬喇！