憤怒鳥（Angry Birds）起飛帶挈遊戲開發商Rovio成為芬蘭嘅「國寶」企業，Rovio創辦人維斯特巴卡（Peter Vesterbacka）舊年開始積極部署拓展中國市場，幾經努力憤怒鳥終於喺上海築起「鳥巢」，Rovio日前就宣布已經喺上海開設咗辦事處，Peter仲話Rovio唔單只要將憤怒鳥帶到中國大陸，更加要透過憤怒鳥將中國大陸展現畀全世界，實行要將內地發展為憤怒鳥嘅「第二巢穴」。
依家內地周街都有憤怒鳥玩具售賣，當中唔少係山寨版，受歡迎至會有老翻嘛。Rovio曾推出過「中秋版」嘅憤怒鳥。Peter表明，「Rovio預計會比中國人更中國化，產品會加入中國文化元素」，未來即使出現牛郎織女版憤怒鳥都唔出奇。
之前有傳聞話，Rovio或者會嚟香港上市，所以憤怒鳥到內地「落地生根」其實一啲都唔出奇，上海辦事處只係進軍內地嘅第一步，下月上海同北京都會有憤怒鳥產品專門店開幕，內地首個憤怒鳥主題公園隨後更會喺十月開張，Peter要使憤怒鳥飛遍整個中國市場嘅大計已開始實現！