雖說上市公司業務有gimmick（花招），可能易sell到畀投資者，但gimmick都有個限度，大陸最近盛傳財神爺間屋財神廟要搞上市，你估投資者受唔受呢？
呢間咁出位嘅廟係喺距離西安60公里左右嘅周至縣集賢鎮趙代村，供奉住趙公明等五路財神，舊年7月先正式開放，門票盛惠60元，隸屬嘅公司西安曲江文化旅遊同時仲擁有西安城牆同大雁塔等景點嘅業權。
絲絲聽業界意見，初步反應麻麻。內地嘅《證券日報》引述咗一啲學者睇法，認為借宗教嚟賺錢已經唔係咁啱，依家仲要用嚟上市簡直過晒火位，擁有業權嗰間公司如果想上市，應該將廟同塔呢類人文建築剔除咗先。就連國家宗教局方面都唔係咁認同將寺廟上市嘅做法，話發展還發展，一樣要顧及社會嘅底線。不過財神廟嘅負責人梗係唔係咁諗啦，仲話叫得做廟嘅，唔一定係廟，財神廟其實係財神文化景區至真。
其實之前少林寺同法門寺都有計劃過上市，不過最終都係受到壓力而不了了之。今次曲江文化可能學精咗，用咗新方法即係所謂借殼嘅方式嚟申請。