俄鋁（00486）尋日搞股東會，絲絲特登悉心打扮，諗住去見一見俄羅斯富豪歐柏嘉（Oleg Deripaska）嘅真人，點知竟然撲咗個空。
原來阿歐生畀俄羅斯啲惡劣天氣阻住咗，就算本身已經「卜」晒專機都無用，仲搞到差啲連董事會都錯過埋。
話說一早有公關界美女通知絲絲，歐柏嘉今年會隆重出席俄鋁嘅股東會。多次與歐柏嘉緣慳一面嘅絲絲，即時諗住把握機會，會一會呢位俄國富豪嘅真身啦。
點知尋日絲絲參加完股東會，就連記者會都完晒，都唔見歐柏嘉嘅身影，莫非絲絲同啲富豪真係咁無緣？！
最終先知原來係天氣問題，搞到歐柏嘉班專機唔可以準時起飛，因此到達時間亦順延咗，搞到趕唔切囉。
公關美女仲同絲絲訴苦話，莫講話記者會啦，就連一年一度嘅董事會，歐柏嘉都隨時可能趕唔切。絲絲嗰一刻就諗，呢啲天有不測風雲嘅嘢，任你係億萬富豪、政要、或手握重兵嘅軍閥都無面畀；所以絲絲見唔到歐柏嘉，雖然失望，但可能都只係緣分未到啫！
余詩韻