自社交塗鴉遊戲「Draw Something」面世以嚟，絲絲一直都有keep住玩！但有時玩玩下會諗，如果有中文版咁就好喇，你都知好多時中文有嘅字英文未必有o架喇。終於皇天不負有心人，Zynga同新浪微博合作喺中國推出咗隻Draw Something中文版喇！
大家可以上微博玩Draw Something中文版，而呢隻版本仲追加咗隻講中文嘅人熟悉啲嘅英文詞彙畀人揀嚟玩添，而簡體中文版就只可以喺蘋果App Store度下載。真係唔講唔知，Draw Something由原本只係得英文一種語言，到依家已經推出多12種語言，包括有法文、意大利文、韓文、日文等等。
絲絲聽Zynga嘅流動業務總監David Ko話，Draw Something起初只係得英文版都已經席捲全球，對於可以為全球玩家引入佢哋本土熟悉嘅元素覺得好高興。佢仲即場舉咗個例子，話點樣畫得出西班牙文「caliente」（英文解做「hot」）呢個字喎。聽佢咁樣講完之後，搞到我都想即刻下載其他版本嚟玩呀！