尋日facebook（fb）終於過咗上市後禁止發表有關公司言論嘅期限，馬上打破沉默反擊過去幾個星期外界話喺佢哋度賣廣告作用唔大嘅批評。
fb先藉住研究機構comScore嘅調查報告顯示，做咗某牌子嘅粉絲，真係會令人買多咗嗰隻牌子嘅產品。fb仲借勢公布埋自己公司內部網站上60個廣告活動嘅研究結果，講明七成嘅廣告活動可以獲得3倍於廣告支出嘅回報，甚至更多，49%嘅廣告回報可達到支出嘅5倍，甚至以上添!
無辦法啦，係fb掛牌前幾日，通用電氣竟然話準備抽起計劃放喺fb嘅1,000萬美元廣告費。連串批評令fb嘅股價比招股價每股38美元大跌約27%。
之不過，網上廣告界人士認為，fb嘅公布數據係選擇性公布，好似嗰60個廣告商名字欠奉，兼且又唔公布成個研究結果。而業界仲同絲絲講，聽到好多大客曾抱怨，話fb做得唔夠好，喺fb落廣告，成本不斷上升，但又睇唔到佢啲廣告嘅實際價值!
講番喺調查嗰四星期入面，comScore追蹤唔同公司，睇下like咗公司嘅粉絲同佢哋嘅朋友，比唔會睇到佢哋fb訊息嘅人，購物嘅頻率究竟有咩唔同。結果星巴克咖啡同埋Target Corp.嘅case分別錄得38%同21%嘅上升。但唔係間間公司結果都咁正面，好似亞馬遜書店嘅粉絲喺Amazon.com花嘅時間係互聯網平均用戶嘅兩倍，但佢哋嘅朋友就只會比平均時間花多8%。