騰訊（00700）自五月中宣布戰略重組後，外界對其發展嘅猜測接近捕風捉影，一時傳有高層調動、一時傳公司分拆，尋日又傳騰訊將會涉足手機生產，推出QPhone手機。主席馬化騰尋日終於喺微博闢謠，再次重申騰訊唔會做手機，更加唔會以特別供應嘅方式生產「扣費機」，而只會以開放態度同所有廠商合作。
馬化騰要喺微博闢謠嘅原因其實好簡單，事關喺過去一段時間，內地不時有傳聞話騰訊會同多家內地對手一樣，自建專屬嘅手機系統平台，之前更謠傳騰訊要「買起」以生產智能手機成功出位嘅小米科技，喺消息被否認後，內地又傳有手機代工商獲騰訊委託，生產一部厚度比iPhone4S薄五毫米嘅QPhone。
不過以馬化騰尋日嘅講法，騰訊喺拓展手機相關業務上，相信係要中立嘅開放平台模式，專注於相關嘅移動應用，難怪佢急於反駁傳聞。
講開傳聞，尋日內地亦有傳，騰訊正計劃推出炒股軟件，並成立證券軟件事業部咁話，不過消息亦已即時被騰訊否認，並指傳聞所指嘅業務模式根本不切實際！