市況唔好，經常都有財經名嘴畀人鬧，話佢哋推介嘅股票輸錢，資深名嘴、豐盛資產金融管理董事黃國英又點會唔知呢個道理呢？最近佢就講，暫時唔再推介二三線股，如果訂閱咗佢嘅網上付費投資建議服務嘅話，可以要求回水。不過黃國英好識做，新加入一個簡單嘅每日買賣建議，氹番啲粉絲，咁你話啲粉絲又點會再詐型呢？
二三線股難玩 停推介
黃國英仲自爆，自己主理隻基金Leverage Partners，舊年至今仲未賺錢，佢好豪氣咁話：「係輸到冧，但未係最冧嗰個，比起好多著名基金仍未係最差。」睇番呢隻基金，資產值都有2,221萬美元，舊年下半年開始確實一路蝕，但今年開始有起色，一至四月回報都有19.51%。
佢話基金買咗唔少二三線股，現策略係善價而沽，即係短炒，仲要正股同衍生工具一齊炒先有得贏，最怕小股民跟一半淨係買股票就實輸。為免累人，佢嘅付費投資建議服務，雖然仲會為二三線公司做分析，但就少咗投資推介。
既然都係畀咁多錢，但內容少咗，咁喺公平原則之下，回水係好正路。不過，黃國英話，雖然網友對佢嘅「回水論」有讚有彈，但暫時仲未有人真係要佢回水。
依家呢個服務只會推介一線公司，仲要係同衍生工具一齊推介，再包埋新增嘅每日買賣建議。黃國英話，如果有朋友肯跟落去，情況好似打機升呢咁，下個戰場好似由旺角場，一下子轉喺大球場踢波，實行同佢一齊同班大鱷死過。
講到好似好好玩咁，不過，絲絲奉勸各位，要衡量自己能夠承受嘅風險先至好跟。
余詩韻