內地房地產商喺樓市調控嘅打擊下，可謂叫苦連天，皆因價量齊跌，專門賣高檔樓盤嘅綠城中國（03900），樓盤主要喺杭州，大受調控影響，不過佢哋堅持唔減價，只肯用促銷策略。唔知係咪「折扣難求」，尋日竟然有內地傳媒，問攞折扣。佢哋老闆宋衛平堅持唔劈價賤賣樓盤，因為佢哋無論起樓嘅態度同埋成本都比其他發展商高好多！
有內地傳媒好珍惜尋日同宋總傾偈嘅機會，問宋總可唔可以畀個折頭佢買樓，宋總都好識做，話問吓合作夥伴，睇吓做唔做到個八八折。當嗰位記者想問多兩個問題，宋總仲打蛇隨棍上，笑笑口咁話叫佢買多間嘅話就畀佢問多個問題。查實綠城嘅樓一向品質都好好，唔少發展商都鍾意，連融創（01918）老闆孫宏斌之前都同絲絲講過，好欣賞綠城所起嘅樓，佢自己都有幫襯買咗間添！