一年一度嘅「股神」巴菲特慈善午餐拍賣會喺美國時間周五晚上十點半結束喇，但係絲絲尋日見到個最新出價只係41.02萬美元（約319.9萬港元），同舊年262萬美元紀錄高位仲差好遠囉，仲只係得84口叫價，反應一般，咁搞法真係驚今年個中標價會好「醜樣」呀！
絲絲聽到唔少行內人都唔睇好今年個中標價，話歐債危機沒完沒了，環球經濟增長放緩，連中國企業前景都好似唔樂觀，可能搞到一直係拍賣會活躍分子嘅中國富豪忍手喎。事實上，○六同○八年拍賣會嘅中標者都係中國人嚟o架，而○八年嗰次仲將個中標價首次提升到去七位數添。
此外，啲行家仲話，可能因為巴菲特患上前列腺癌，需要喺七月中開始進行為期兩個月嘅放射治療，期間行動可能唔方便，而佢嘅投資旗艦巴郡近呢三年嘅投資回報表現都跑輸標指，都可能搞到今次拍賣會個氣氛較往年冷淡。
其實，依家喺巴郡擔任投資總監嘅韋施勒，就係上兩屆拍賣會嘅中標者，佢都係同巴菲特食完餐飯之後受到賞識先加入巴郡，但今年巴菲特講明話個拍賣會唔係用嚟畀巴郡請人，唔知咁樣又會唔會嚇走一班人呢？
不過，拍賣會嘅叫價通常會臨到最後一刻爆上去嘅，究竟最後破唔破到紀錄，大家拭目以待喇。