兩年前協助農業銀行（01288）喺香港同上海同步上市嘅功臣潘功勝，上月開始有傳聞話佢就快辭任農行副行長一職，呢個消息尋日終於得到證實。農行正式發出通告，話「根據國家金融工作需要」，潘功勝已經辭去佢喺農行嘅職務，尋日下晝生效。
農行尋日公布埋管理層去年嘅薪酬情況，潘功勝嘅稅前薪酬合計有164萬元人民幣，當中已包括基本年薪、福利等等。潘功勝開完會之後，話依家銀行股被嚴重低估，仲話農行會遵守上市後三年內，唔會再融資嘅承諾。
農行發出通告無幾耐，就有內地傳媒報道，話潘功勝已經到咗人行接替人行前副行長杜金富嘅工作。不過，人行至今仲未正式公布呢個任命。
市傳49歲嘅潘功勝係畀人行睇中，招攬佢做副行長。潘功勝係中國人民大學經濟學博士，先後帶領工行（01398）同農行上市，被視為內銀股改上市嘅功臣之一。
由於人行係央行，潘功勝呢次調任，其實即係升官；而且根據過往經驗，做得人行副行長呢個位，日後好大機會被委派出任四大銀行行長，可以講係前途無限。