鐵觀音要登陸證券交易所！話說內地監管機構收到福建安溪鐵觀音股份有限公司嘅申請，希望喺深圳證券交易所上市，成事嘅話，將會係內地A股市場第一家純茶葉類上市公司。
原來名茶除咗有價有市，毛利率都幾高，據文件披露，普通小包嘅鐵觀音產品都有52%毛利，陳年嘅舊茶更高達74%。今次公司會發行2,290萬股，集資1.57億元人民幣，用嚟拓展銷售網絡、興建生產線，同埋茶園建設。
絲絲雖然對飲茶無深入研究，但都聽過鐵觀音茶葉以安溪嘅出產係最聞名。不過唔講唔知，「安溪鐵觀音」只係一個統稱，而唔係一個品牌，呢間要申請上市嘅茶企持有嘅主要品牌叫做「鳳山」。如果佢有機會嚟香港發H股，大家真係要搞清楚呀。
申請緊去倫敦另類投資市場（AIM）上市嘅NTL Group仲犀利。呢間新加坡公司主業係幫人睇風水、塔羅占卜同埋婚姻介紹，去年稅前利潤有1,674萬港元。上市時仲會授予期權畀風水大師一類「關鍵員工」。公司未來三年會開拓中國市場，計劃開50家專門店。
不過唔少網友都話，中國大把風水師，加上各處風水各處例，想賺中國人錢冇咁容易。
唔知大家仲記唔記得，○九年時仲曾經傳過少林寺都要上市集資呢？日前中國國家宗教局局長王安就一錘定音，話明「不得將宗教活動場所作為企業資產打包上市」。以後乜乜寺、物物廟都唔使再提要上市嘞。