金融服務界日前舉行大型聯歡晚會，出席派對嘅除咗港交所（00388）前行政總裁周文耀外，仲有九大證券團體中堅分子同多家證券行代表，四十圍座無虛席，認真熱鬧。
全晚最好玩都算係證券界輪流上台唱K，大家一邊開餐，一邊聽歌，真係絕無冷場。唔講唔知，原來金融服務界勁多「歌王」，個個唱得有板有眼，好似中銀國際副執行總裁謝湧海、中資證券協會會長閻峰、富昌證券研究部總監連敬涵、耀才證券市務總監郭思治等等全部係唱得之人，又有台型。
其實金融服務界「歌王」唔只佢哋，只係因為當晚場面氣氛實在太踴躍同熱烈，有太多人同一時間上台獻唱，恕絲絲不能盡錄所有金融界「歌王」！
大家咪睇謝總平時個樣有啲嚴肅，唱起歌嚟中氣十足，果然係真人不露相。金融界眾多「歌王」唔只識唱時下流行曲，一啲絲絲從未聽過嘅「老歌」，或者內地嘅名曲都識唱，證券經紀果然係「周身刀、張張利」。
當眾人上台湊熱鬧，金利豐老闆娘朱李月華似足小fans，喺台下欣賞，絲絲問佢點解唔唱埋一份，佢就話好少唱K，但朱生就好鍾意。
金銀業貿易場理事長張德熙全晚亦好high，成晚攞住酒杯滿場飛，金銀業貿易場今個月會重選主席，希望佢可以順利連任喇！
余詩韻