成日出入中上環區域，見到唔少高檔次產品，離唔開名牌手袋、鐘錶珠寶、新款電子產品等等。近年隨住金價日漲，金飾當然係水漲船高啦，金舖亦開到成行成列。六福集團（00590）主要賣各類黃鉑金首飾、黃金裝飾品、鑽石首飾、翡翠、寶石及其他配飾。集團植根香港，本土市場一向係集團嘅主要獲利來源，截至一一年三月底止年度佔集團總收入約72.8%。集團喺香港經營咗差不多33間零售店。近幾年金價飛漲，集團亦乘住呢個勢開多幾間舖。
內地旅客嚟香港消費，一向只會買幾樣嘢。點解要行到咁遠買？只因一個字：「真」！愈昂貴嘅嘢，內地同胞就愈要嚟香港買，皆因要減低風險也！
集團呢幾年亦受惠於國策，尤其係一○年十二月實施嘅常住深圳非廣東籍居民「個人遊」計劃嘅更動，令來自旅客嘅銷售額持續增加。
中國經濟增長強勁，令集團業務獲益不少。回顧去年度內集團喺中國市場方面嘅收入佔總收入約17.3%，上升63.9%。呢個數值對比集團嘅本土業務，當然係微不足道，但係大家唔好忽視佢嘅增長速度！假如公司憑藉香港經營嘅知名度，成功將品牌打入內地市場，絕對會成為公司未來嘅金蛋！
睇番數據，集團上年盈利增長約7成，市盈率約9倍！繼續追蹤、出發！
香港大學電子金融服務榮譽助理教授 徐燦傑