自從金融危機以來，銀行對員工嘅開支佔純利嘅比例不斷上升，但係派息比率就不斷下降，喺○六年股息佔可分配盈利嘅15%，到咗依家就下跌到4.5%，而同期銀行對員工嘅開支就由58%，急升到歐債危機爆發後嘅81%。
絲絲終於明白，點解班小股東喺股東大會上會怨氣多多啦。
滙控算最錫小股東
個調查包括咗巴克萊、美國銀行、德銀同瑞信等國際知名銀行，結果都唔係一面倒唱衰銀行嘅，原來滙控（00005）都算幾有班股東心，股息佔盈利19%，係調查中對小股東最慷慨嘅銀行，佢對員工嘅開支五年以來都維持喺54%，唔知同集團嘅精簡架構計劃，有無關係呢?
余詩韻