倫敦奧運前哨戰不得不提各國參賽隊伍嘅「戰衣」，所謂「工欲善其事 必先利其器」，今年中國五大「夢之隊」奧運戰袍就有李寧（02331）做贊助，務求先聲奪人。李寧為咗加強中國元素，特別趁今年中國農曆「龍」年再以「赤鱗」為主題，中國體育隊「粉絲」仲可以喺下個月就有機會買嚟珍藏添。
李寧喺○八年北京奧運時候，就贊助過乒乓球、射擊、跳水同體操四大金牌之師，計落當年中國代表團總共攞到51枚金牌，但淨係呢四隊就足足攞咗一半有多，有27枚金牌成為佢哋嘅囊中物，今年李寧再下一城，仲贊助埋另一奪冠大熱中國羽毛球奧運代表隊，相信李寧贊助中國冠軍人馬嘅威名輕易遠播中外。
李寧喺周三嘅北京發布會上就介紹，「赤鱗」系列比賽服嘅創意靈感源自中國傳統有關龍嘅文化，當中龍嘅五種神性，包括好飛、征瑞、喜水、通天、靈性，仲分別命名為體操隊、射擊隊、跳水隊、乒乓球隊同羽毛球隊嘅戰袍。最厲害係每件戰袍上都有好多可以根據人體情況自動開合的「赤鱗窗」，兼具加速透氣、減少運動員熱量損失嘅功效，睇嚟中國體操名宿李寧並無外界所指般處處「媚外」，大戰當前仍心繫國家嘅！
余詩韻