如果大家係夜貓一族，大家會留意到公仔箱於午夜重播電視劇，係由吉利汽車（00175）主席李書福做顧問，故事中嘅車廠更係以吉汽嘅發展為藍本，話中國汽車最終走向世界。
今時今日李書福透過吉汽母公司吉控入主富豪汽車（Volvo Cars），中國汽車走向世界已經唔再留於喺電視劇嘅橋段，李書福近日接受內地傳媒訪問時就話佢最佩服嘅人就係佢自己，不過大家唔好誤解成功使到佢自我膨脹，只係由於佢太堅持追求夢想。
李書福三年前用18億美元收購瑞典富豪，外界質疑佢會否成功，如今富豪成功扭虧，全球市場份額增長20%，李書福就話整體營運非常平穩，惟過程當中「有成功有失敗，有順心亦有不順心」嘅，好似喺說服富豪管理層集中發展豪華車市場，佢就花了極大努力。而集中發展豪華車，預料亦可有助富豪將內地發展第二個本土市場，因而減低富豪對歐美市場嘅倚賴。
李書福入主富豪後一方面強調要保留其北歐汽車嘅基因，一方面又話要力拓內地市場，當中涉及嘅難度與衝突已經唔細。
原來佢仲有更大嘅理想，就係開創「全球型企業文化」，希望發展出一套超越國籍及種族嘅企業發展模式。其對夢想追求嘅熱切，實在使人佩服。
余詩韻