理財創富：孖妹Ｓ檔案：股壇小花 才貌雙全
「女人唔易做」！而孖妹覺得現今嘅女股評人就更加難做。點解？你識得講股論市，散戶會話合情合理；但如果你無料扮有料，佢哋就會叫你做「花瓶」。其實環球股市千變萬化，港股數量過千隻，我同你都係得兩隻眼，邊有可能睇得晒呀？不過，錯就要認，打就要企定。今日孖妹向本地股壇五位金融小花親下戰書，用金融問題考佢哋嘅投資分析力，以證明佢哋真係智慧與外表並重，散戶都可以玩埋一份o架！
金融問題考考你
Q1. 請說出「社保基金」（Social Security Fund）的全名？
Q2. 《The Black Swan》（黑天鵝效應）是由誰人撰寫？
Q3. 哪類項目佔中國CPI最大比重？
Q4. 歐盟是由歐洲多少個成員國所組成的經濟及政治聯盟？
Q5. 請列出市帳率（PB）的公式？
長線防守 短線睇氣氛
高妹考考你：「投資有長有短，咁即係長線買咩股？短線又買咩股至啱先？」
王：「散戶入市前嘅首要動作係做風險評估，咁先會知道自己嘅投資策略係長線定短線為佳。而我嘅意見係，長線投資而言，散戶應該買啲穩健產品，如iBond（通脹掛鈎債券）、公用股及高息股；短線的話，咁就要視乎整個大市氣氛及周期性因素，千萬唔好將資金買晒落一個股票板塊之上，令風險集中，同時亦要留啲現金喺手，準備市況大跌時，仲有錢可入市撈底。」
測試成績：3分（答中Q3至Q5）
小花1號：國泰君安投資咨詢部分析員 王昕媛
Profile
王昕媛（Cyril）
入行年份：二○○七年
現職：國泰君安投資咨詢部分析員
學歷：城市大學生物及化學學系學士畢業
投資經驗年期：五年
個人擅長研究股票板塊：基建股、內房股、煤炭股
投資組合：沒持有股票，主力投資物業
個人投資獲利最高金額：不方便透露
忌借孖展 跟市況「執生」
彩兒考考你：請你講出散戶炒股時必須謹記嘅三大重點？
李：「第一點係要清楚知道自己可承受嘅風險程度，做任何投資都切忌借孖展，以免大市出現大上落時，隨時畀大戶挾倉或斬倉；第二點係因應年齡、教育程度、經驗去控制投資比重，後生仔當然可以炒短線，輸咗都有機會翻身，但年紀大嘅散戶就應該買藍籌做長線喇；第三點一定係小心市況變動，隨機應變，嚴守止蝕位。」
測試成績：3分（答中Q1、Q3、Q5）
小花2號：新鴻基金融分析員 李惠嫻
Profile
李惠嫻（Hannah）
入行年份：二○一○年八月
現職：新鴻基金融分析員
學歷：中文大學新聞及傳播學系榮譽學士畢業
投資經驗年期：六年
個人擅長研究股票板塊：高端消費股、石油股、金礦股
投資組合：沒持有股票，主要做人民幣定期存款
個人投資獲利最高金額：○八年曾經炒某隻股票窩輪，賺得15,000元利潤離場
幣策入手 上至下研究
彩兒考考你：大市千變萬化，請問你分析大市時有咩秘訣呢？
潘：「先睇外圍經濟及大國嘅貨幣政策，從而了解大市偏向好或淡嘅發展；然後睇技術分析，如日線圖、周線圖、恒指平均移動線、RSI（相對強弱指數）；最後我會研究股票嘅年報及財務報表，好似利潤表（P&L account）、資產及負債（Balance sheet）、現金流等。」
小花3號：天大証券投資服務副總裁 潘慧鈴
測試成績：5分（全部答中）
Profile
潘慧鈴（Elaine）
入行年份：二○○五年
現職：天大証券投資服務副總裁
學歷：歐洲大學工商管理碩士畢業
投資經驗年期：十二年
個人擅長研究股票板塊：本地中型銀行股
投資組合：持有2隻股票
個人投資獲利高金額：在○八年首季開始買實金，買入平均價為每安士820美元，持貨數年，最後於1,600美元全數沽出，獲利60萬元。
消費力弱 咪掂零售股
高妹考考你：你點睇本地零售股嘅前景？現時可唔可以入市撈底先？
王：「我對零售股前景都睇得幾淡，因為內地自由行嘅增長數字難復當年勇，加上內地經濟增長又放緩，人均消費能力開始減弱。你睇番剛過去嘅『五‧一』假期，本地零售股都炒唔起就知咩事喇，可見自由行已經唔係零售股股價嘅催化劑。加上現時環球情況仲係混亂，我唔建議投資者入市撈底住。」
測試成績：3分（答中Q1、Q3、Q5）
小花4號：華富嘉洛證券分析員 王婉庭
Profile
王婉庭（Joyce）
入行年份：二○一一年三月
現職：華富嘉洛證券分析員
學歷：美國柏克萊大學新聞及傳播學系學士畢業
投資經驗年期：三年
個人擅長研究股票板塊：珠寶股、化妝品股
投資組合：沒持有股票，揸現金為主
個人投資獲利最高金額：○八年於5元買入東風汽車（00489），後於11元沽出獲利，賺得數萬元
「五窮」超賣 六月「衰唔晒」
高妹考考你：市場有「五窮六絕七翻身」之說，咁你又點睇六月港股走勢？
麥：「我預料六月大市仍會受歐債危機不明朗因素所困擾，包括希臘國會於六月十七日重選、歐洲銀行財困問題等。而美聯儲局嘅扭曲操作將到期，屆時市場焦點將集中於美國會否推出類似變種嘅量寬措施。但恒指經過五月份調整，技術指標已經出現超賣，因此唔排除大市會藉住利好消息，出現技術性反彈，如內地推出適度寬鬆政策以提振經濟，及中央於七月一日新特首上任時送大禮等，料六月淡勢中仍有小曙光。」
測試成績：5分（全部答中）
小花5號：凱基投資顧問部經理 麥嘉嘉
Profile
麥嘉嘉（Avis）
入行年份：二○○六年
現職： 凱基投資顧問部經理
學歷：澳洲新南威爾斯大學國際金融學碩士畢業
投資經驗年期：八年
個人擅長研究股票板塊：地產股、內房股、收租股、房託基金
投資組合：持有18隻股票，板塊包括金融、公用、能源、電訊、工業、消費等
個人投資獲利最高金額：於5元買入中煤（01898），後於25.5元沽出，獲利逾20萬元
答案
1. 全國社會保障基金
2. Nassim Nicholas Taleb（中譯塔利布）
3. 食品
4. 27
5. 市帳率=股價/每股資產淨值
若有料報畀高妹同彩兒或有嘢問，可電郵money.biz@opg.com.hk