Market Insight：市場信心急速下墜
五窮六絕，美國五月份就業數據教華爾街失望，新增職位得6.9萬份，唔及預期15萬份的一半，亦係一年來最差，道指跌274點報12,118點，同時把年初至今升幅化為烏有，歐洲債務危機，中國出口急速減慢，世界兩大經濟體系都開倒車，美國經濟引擎一旦熄埋火，地球村經濟病重，隨時推入深切治療部。
周末唔少美國經濟學者，認為五月弱到極的就業數據，可促使聯儲局提早推出新一輪QE，至少都令十九、二十日的會議上，會把月底到期的扭曲操作（OT）有效期延長，看來市場仲係太樂觀？不妨睇數據公布後，周五美國10年期及30年期債券孳息率，已雙雙創出新低，10年期債息一度跌至1.4387厘歷史低位，亦比去年九月歐債危機第一波的1.72厘低位為低，資金避險情緒較去年有過之而無不及。
中學生經濟科都應該學過邊際效益遞減（DME），息口低處未算低，到今日長債息連1.5厘都無，同日本長債息差距唔夠0.6厘，即使再推低啲啲，對刺激經濟作用亦會日益低落，睇情況聯儲局要再想吓QE之外的其他辦法。
最多人有興趣，是美股終極一跌到底出現咗未？上周五美股的恐慌指數（VIX）急升2.6去到26.66的半年新高，不過比起去年七、八月，指數由18抽升至48水平，恐慌到極的大跌市，看來是仲未出現。
股民最好自求多福
古勝周末(目及)到實，睇睇中國及歐洲央行會否有聯手措施，撫平動盪金融市場。其實，綜合整個歐盟，又或者個別國家好似法國、意大利、西班牙、荷蘭、比利時、希臘、丹麥及愛爾蘭嘅第一季GDP跌至1%樓下，第二季極可能更差的同時，歐洲央行有條件將1厘基準利率，索性減到半厘，甚至同美國0至0.25厘睇齊，最後唔單止無見歐央行出手，希臘同歐元區的博弈反見升溫趨勢，德國總理默克爾強硬話，絕對唔支持發歐元共同債券的新聞，完全無讓步餘地，今次膽小鬼遊戲要去到幾大鑊？市場信心急速下墜，看來股民唯一可做是自求多福。
專做皇室貴族及歐洲超級富豪生意的格拉夫（Graff），在公布押後上市前，搞了一個盛大推介會，出動到1,250卡鑽飾，在場仲有原粒的百卡鑽戒，畀一班賓架及準股東試戴兼拍照留念，無奈股市唔生性，有調查機構（BCG）數據話歐債危機下，歐洲有銀人士比例大縮水，俗語話形勢比人強，保薦人工夫做到足，可惜29倍天價估值，短期要芬佬落疊確係唔易。
押注金價賭擴量寬
跌市中購買力不斷被市場黑洞吞噬，財經名嘴陶冬上周中估中央有至少2萬億人仔救市，結果衝動博反彈的又變蟹民！從外圍走勢，港股今日低開二三百點無可避免，惟上周五美國數據之後，金價罕有地一洗頹風，抽升近60美元，一日內破10日、20日及50日線幾個短期阻力位，似乎市場押短期內世界三大中央銀行會推出更大規模量化寬鬆，開始賭貴金屬市場。會唔會又中空寶？要睇金價是否能夠企穩1,600美元樓上。睇番五月中，紫金（02899）股價見過2.27元低位後，有市跌佢唔跌的走勢，自認膽生毛堅持要日日賭過至安樂的，不妨留意。
今年人仔升值幅度有限，近幾年靠人民幣升值帶來匯兌收益充撐業績的內地航空股頓失依靠，股價紛紛尋底。不過，近期油價持續下滑，相信航空股的航油成本壓力亦得到紓緩，上周五見到國航（00753）、南航（01055）及東航（00670）逆市上升，升幅介乎3至4%。
究竟今年航空業是否已見谷底，仍然難下判語，特別係如今連內地需求都明顯轉弱，唔排除今次行業下跌周期為時會較預期長，所以古勝認為，若然呢轉反彈三隻航空股未能突破大型下降軌阻力，有貨最好把握落車機會。
嘟QR碼睇20大
古勝又有好介紹，為了向讀者提供更多優質服務，《東方產經》已將部分股市行情版的資訊放到手機版網頁上，讀者可以用智能手機的閱讀QR編碼應用程式，掃描刊於行情表內的QR編碼，快速進入相關網頁，瀏覽包括派息備忘、沽空紀錄、大手成交等行情資訊，讀者更可掃描在古勝專欄內的QR編碼，查閱港股二十大升跌及成交的即市資訊，緊貼市場脈搏。
古勝