楊元慶正式接任聯想（00992）董事局主席後，集團業務表現對辦，好多人都認為聯想要成為全球「PC行業一哥」嘅目標指日可待，早已被認定為「最高薪紅籌CEO」嘅楊元慶，自然有人工加。聯想年報披露，楊元慶喺剛過去嘅財年，總薪酬上升19.6%去到1,421.8萬美元，進一步逼近有「打工皇帝」之稱，和黃董事總經理去年1.7億港元嘅年薪，就算同主要競爭對手HP（惠普）相比，人工亦唔會輸蝕。
按聯想年報披露，楊元慶喺三月結嘅財政年度，基本薪金按年上升17.6%至107.2萬美元，至於佔整體人工比例最重嘅酌情獎金同長期激勵獎勵，就分別達516.8萬美元同775.4萬美元，以埋單計算嘅1,421.8萬美元（約1.1億港元），佔聯想去年4.73億美元盈利約3%左右。不過呢份「人工」，當然唔包括佢之前減持股份嘅帳面收入，同持有近9%聯想股份所收嘅股息。
過往有意見話聯想作為一家中資企業，楊元慶嘅人工有偏高之嫌，不過從聯想已成為真正嘅跨國巨企角度嚟講，佢嘅人工基本上只係同環球科技企業接軌。事關據外電之前引述美國證交會嘅資料，聯想主要對手HP，其行政總裁惠特曼（Meg Whitman），雖然只收取1美元象徵式嘅底薪，不過計埋各類花紅同埋股權收益，實際人工達1,650萬美元。若以蘋果公司總裁庫克，去年估計達3億美元人工嚟計，楊元慶嘅薪酬更加係小巫見大巫囉！
余詩韻