大家知唔知道內地有幾多超級富戶呢？根據波士頓諮詢公司公布嘅《全球財富報告》顯示，內地有648個私人財產超過1億美元嘅超級富戶，全球排名高踞第5位，連法國、瑞士都唔夠中國咁多呀。
講到財富，美國無論係財產喺百萬美元嘅「普通」富戶，抑或身家成億美元嘅超級富戶，佢哋嘅數量都係全球最多嘅。淨係富戶就多達513萬戶，第2位嘅日本有158.7萬戶，中國以143.2萬戶緊追日本，相信好快又會爬埋日本頭嘞。
呢項統計所講嘅財富，係指個人所有嘅銀行存款同現金、股票、債券、基金、壽險同養老金等，但唔包括房產。報告預計，中國嘅富戶數量仲會繼續增加，因為仲有好多公司等緊上市，而新一代企業家拚搏搵銀，富戶嘅數量一定節節上升。
去年全球經濟唔穩定，發達國家嘅股市又唔爭氣，所以全球私人財富只係增長咗1.9%。但係內地嘅超級富戶仲多咗110戶，升幅係20%。
就連財經雜誌《福布斯》都話，依家全球最大嘅財富增長引擎就係中國嘞。
余詩韻