絲絲講場：鄭志剛領導藝術
新世界發展（00017）創辦人鄭裕彤（彤叔）嘅長子嫡孫鄭志剛（Adrian），平日身兼新世界系內嘅多個職務已經夠忙，不過都無損佢對文化藝術產業上嘅支持。
尋日絲絲就喺一個由香港藝術行政人員協會同西九文化區管理局合辦嘅文化領袖論壇上面見到Adrian，佢負責擔任嘉賓，咪以為Adrian只係做生意叻，絲絲睇佢同啲講者對答如流，就知平日Adrian好留意文化藝術嘅發展，而絲絲覺得，最難得係Adrian更做到身體力行添！
新思維搞創意
唔好以為只係得個講字，Adrian創辦嘅K11就係一個例子，K11係藝術購物中心，就係以藝術、人文、自然融合為一體。
另外，佢同時都係周大福文化慈善基金嘅主席，而佢早前再推出全新企業核心價值——「UNITI」，即係強調重創新、求進步嘅企業文化。
而「UNITI」嘅意思亦係代表住Adrian嘅嶄新思維，「UNITI」入面嘅五個英文字母，分別係代表你（You）、新世界（New World）、創新（Innovation）、信任（Trust）同埋進步（Improvement），象徵住新世界今後賴以成功嘅核心價值。
藝術細胞爆棚
絲絲仲記得Adrian早前先啱啱搞過一個「UNITI工作坊」，Adrian就充分發揮佢嘅藝術細胞，喺工作坊裏頭搞咗好多創意攤位，利用繪畫、音樂同埋攝影，去激發員工嘅創新思維，提升員工嘅藝術感同創意，從而達到提升公司嘅企業文化。
唔怪之得呢次Adrian見到絲絲，都連忙係咁話佢自己近期都好忙啦！
余詩韻