一提起互聯網同電腦，大家都會精神一振！電腦世界花花萬千，既方便我哋嘅生活，又方便我哋嘅工作，我哋同電腦世界已經難離難捨！
大家都應該識得聯想集團（00992）！就算唔知聯想係乜，都知道IBM係乜喇掛，係咪？集團主要負責銷售同製造個人電腦，又係生產商又係營銷商。同時間，集團仲發展出獨有嘅相關訊息科技產品、流動電話同埋提供先進資訊服務。
睇番數據，佢充分掌握咗全球個人電腦市場相對較快增長嘅趨勢。隨住新興市場不斷發展，唔少家庭都開始有自己嘅電腦，呢個趨勢相信仍然會主宰住集團未來嘅成長能力！
集團嘅流動電話業務表現更加頂瓜瓜，傳統手機業務銷量增長強勁，又喺中國推出咗「樂Phone」智能手機。蘋果公司嘅iPhone帶動咗唔同嘅Apps出場，智能手機好似雨後春筍咁，各款新型手機不斷推出市場。大家依家工作生活都已經畀唔同嘅Apps圍繞住。隨住中國各大城市繼續發展，所以預計聯想嘅智能手機業務只會愈賣愈好賣！
根據同行估計，聯想一直都係中國第一大嘅本地移動手機品牌，亦即係大阿哥。藉住品牌效應去協調移動互聯網市場嘅發展策略。由呢一個爆發點去諗，集團其實仲想喺中國呢個大市場入面，繼續「做大個餅」！大家真係唔好睇小聯想佢追趕相關產品潮流嘅步速！只要畀佢是但一樣嘢帶起個潮流，隨時化身成中國日後嘅「蘋果」！繼續追蹤、出發！
香港大學電子金融服務榮譽助理教授 徐燦傑