俗語有云，有錢使得鬼推磨。金占士最近同內地金融圈朋友閒聊，話大陸依家啲監管機構，最buy用獎金形式，鼓勵各方面嘅二五仔，舉報違規事件。
事緣中證監稽查局負責人最近提及過，證監會近期公布同擬公布嘅一批典型案件，都係依據投資者提供有價值嘅料，一步步咁查出嚟。證監會打算研究按舉報金額比例對舉報人實行獎勵，為咗有根有據，仲諗住設立相關辦法，甚至將該辦法寫入新《證券法》中，以鼓勵廣大投資者積極參與舉報內幕交易案件，切實維護投資者利益。
老友話，違規事項知得最清楚嘅，首推公司管理層，然後就係核數師、律師之類嘅專業人士，佢哋既係有第一手資料，亦有相關專業知識分析真偽，反而投資者嘅資訊就係第N手。
咁即係話，上市公司高管，同埋專業人士嘅「二五潛能」至高，之不過，專業人士有專業守則，簽晒保密協議，如果發現有唔妥，最多跳船，好少告密嘅，以免影響自己聲譽，要佢哋做二五，唔係有錢獎勵就得。
最近有一家上市公司畀人指控遭受調查，傳聞話係高層「篤」出嚟，之不過，好人好姐點會「篤」自己間公司，咪就係大家嘅關係有摩擦，至爆料啫。
中證監呢條橋得唔得，就要睇吓係咪咁啱遇着呢啲人喇。
金占士