絲絲講場：內地有批慳家大富豪
相信大家都見識過內地「先富起來」嗰班同胞嘅購買力有幾驚人，但唔係人人都餐餐食鮑參翅肚、去名牌舖頭掃貨嘅。有啲富豪發咗達一樣咁慳儉，仲係遵循自己嘅消費哲學，好似新希望集團董事長劉永好，最鍾意係睇書、最慣常嗌嘅餸係回鍋肉，可能畀大家仲慳家架。
劉永好只愛睇書運動
「炫富」成為唔少白手興家有錢人嘅最新標籤，但有唔少身家過百億嘅企業大老闆生活低調，佢哋買嘢嗰陣可能冇人望多眼添。劉永好就自爆鍾意簡樸生活，唔打高爾夫、唔識買豪華遊艇，最大嘅消遣係睇書、運動同影相。食飯嗌餸都係地道川菜，麻婆豆腐、回鍋肉同螞蟻上樹。不過，佢話唔係專登咁慳家嘅，只係工作太忙，冇時間去消費啫。
內地「光伏大佬」英利新能源總裁苗連生，個人財富已經超過一百四十億人仔，一樣唔鍾意喺自己身上使錢。呢位河北首富嘅消費習慣好簡單，只要唔使為食飯埋單發愁，着衫乾淨得體、住嘅寬敞舒適就得，「做乜一定要名牌啫？」
董明珠置裝冬買夏着
仲有內地人工最高嘅女性經理──格力電器總裁董明珠（圖），佢唔鍾意消費者買公司產品嗰陣討價還價，但自己就專吼減價戰至去買衫，策略係「冬天買夏天衫，夏天買冬天衫」。嘩，數口真係精嘞。