絲絲講場：林錦堂過檔花樣年無抖過
呢幾年喺香港上市嘅內房股有好多，在在需要人才。你睇上個禮拜三辭任奧園（03883）執行董事兼財務總監嘅林錦堂（Tony），話咁快就過檔去花樣年（01777），喺啱啱嘅周末，絲絲去花樣年嘅樓盤參觀，Tony經已以「主人家」身份現身。花樣年尋日仲已經出埋通告添，委任佢做執行董事，前後只相距四日，效率真係快。
花樣年話，Tony會做執行董事、公司秘書兼授權代表，即日生效。絲絲相信，大家以後都會成日同Tony接觸，因為佢同時都會兼埋媒體關係部分。佢有權收取年度酬金260萬元，並將享有董事會全權釐定嘅酌情花紅。
離開奧園即返新工
講番Tony，早兩日花樣年為佢哋喺桂林嘅麓湖國際舉行發布會，主席潘軍就藉住呢個機會同大家介紹吓，見見面。絲絲聽Tony講，佢二十二日離開奧園之後就已經即刻返工，假都無放過，認真勤力。查實佢做過唔少上市公司管理層，○六年至○八年做過綠城（03900）公司秘書，到○八年底加入奧園。
坊間估計，Tony過得去咁急，嚟緊應該有啲搞作。面對仍未靜止嘅內房壓抑措施，潘軍就話希望可以提升佢哋嘅金融運作平台，實行用金融平台驅動，服務為核心，咁先可以唔會過幾年就畀市場淘汰咁話。