債務危機搞到希臘人一頭煙，個個都唔想政府閂水喉，唔想勒緊褲頭過日子，點知救兵之一國際貨幣基金組織（IMF）總裁拉加德，上個禮拜五發表惹火言論，辣慶希臘國民，佢哋湧上facebook（fb），留下成萬個留言鬧爆拉加德唔單只冇體恤民情，仲要火上加油。
拉加德究竟講錯乜呀，搞到好似犯眾憎咁！
佢早幾日話，自己一直係「焗住」體諒希臘人，勸佢哋盡番公民責任交齊稅，咁先至救到自己國家；又話佢關心非洲貧窮問題多過希臘經濟危機。佢仲引用例子，話喺尼日爾小村莊嘅學童，一日返學兩小時，三個人坐一張椅子，佢哋非常渴望受教育，「我認為他們比希臘人需要更多嘅幫助。」
希臘人真係睇到把幾火，喺fb開埋反拉加德嘅page，集中火力宣洩憤怒，加埋有成萬七個留言，話拉加德當佢哋係賊，有啲留言屬於謾罵式，有啲直情係人身攻擊，污言穢語唔少得，就連前財長、社會黨領袖韋尼澤洛斯都加把嘴，話不滿拉加德侮辱希臘人。
法國新政府發言人Najat Vallaud-Belkacem亦都唔蝕底，講埋一份。
佢指拉加德嘅言論過於單純兼老套，依家唔係教訓別人嘅時候，咁講邊會幫到件事o架！
成為眾矢之的嘅拉加德氣定神閒回應罵語，透過社交網絡話對於希臘國民面臨嘅挑戰予以同情，但重申人人都應該履行繳稅責任。
余絲韻